Mapu-mei he-ngalu:

Tauto’e ‘a e Kehe´

{utther}

Lalama ho fofonga´ telia e fakaehau
Lalaka ho nima´ he fou’anga toputapu
Lango tutulu, fakaafea e tomui-he-lau
Fakaheka ta’u pea paki ke tau-kei-kau;
Kuo li’aki atu kotoa ‘emau faka’anau´
Fonua tanu ki he ta’e’iloa´, toki fakaa’u.

Inu he nifo na’e fuofua fakatapua
He ‘aho ne tapu, pea toe fakangofua
‘Oua na’a veteki faka’aungafa mo’ui
Telia na’a monuka e loto kuo lea’aki´
Tuketuke ke hiki e uma si’i ta’epapae
Hota ngafa´ kuo tongi ke tuku-i-mate.

Na’a mo’o e masiva´ hota ‘uhinga´
Fungani ia na’e tala he ‘api ko Maka´
Fanguna si’i li’ekina´ pea fakamafai
Ongona si’enau tauto’e´ pea fakaai
Fa’o mai pea fua he kuo fu’ifu’i-tahi
Na’a fai tafi ‘e he ngalu kuo ma’ahi´.

Ala he sia´ pea ala he kauhala´
Molumalu tatau ‘ikai vaetu’u-ua
Fou’anga taha ‘a e palai´ mo e tua´
Toki tala ‘e he a’u si’eku tupu’a´
Lapasi e si’ekina ke vete fakahau
Pea tui fakatapu ha ‘ulungämanu

Tau:
Kuo tavänuku e muifolau´
‘O tatali mai mei tu’a ngalu
Fola fala-’emalata e pikilau´
Ke veteange honau kaha’u´
He lalo langi kei fu’u malü