Tonga on the 'NET - Saame 1-10

Mapu-mei he-ngalu:

Ko e Saame 1-10

Ko e liliu-lea fai 'e Jione Havea

‘Oku ‘oatu heni e liliu-lea ‘o ha ngaahi konga ‘o e Fuakava Motu‘a´ mei he mu‘aki-lea ‘o e Tohi Tapu´, ‘a ia ‘e ‘oatu fakakongokonga ‘i he taimi faingamälie. Ko e ngäue faingata‘a eni he ‘oku ‘ikai ko e liliu-lea pë ka ko e ohi-‘uhinga foki. ‘Oku lamalama taimi hono fakahoko´, pea fai tau‘atäina mei he liliu-Tohitapu ‘oku kautaha ai ‘a e Kösilio Fakafonua ‘o e Ngaahi Siasi ‘o Tonga´ mo e Kautaha Lau-Tohitapu ‘o e Pasifiki. ‘Oku mahu‘inga ke faka‘ilonga‘i ‘a e ‘ätakai ‘o e ngäue ni, he ‘oku ‘ikai pule‘i ‘e ha feohi‘anga lotu pe fakakouna ‘e ha monü‘ia faka-e-koloa, ka ko ‘eku fie fekuki pë mo e fu‘ufu‘unga lea ‘o e Tohitapu´. ‘Oku ‘i ai e ngaahi ‘uhinga fakaekita ki hono ‘ahi‘ahi e ngäue ni, kae fe‘unga pë mu‘a ‘eni ki he taimi lolotonga ni´: Ko e manako pë ki he Fuakava Motu‘a´. Taumaiä ‘e ‘i ai ha liliu-lea te ne lava ke puke kotoa ‘a e mu‘aki-lea´, pe ‘ata‘atä mei he ngaahi a‘usia mo e hoholi ‘a ia ‘oku fai ‘a e liliu-lea´!

‘Oua na‘a ‘itengia ‘oka tuai e hoko atu´, he ko e vavaku ni ‘oku hangë pë ha "mapu-mei he ngalu´." ‘Oku ongona ‘a e le‘o´, ka ‘oku kei lofia hono fötunga´. ‘Oku fai fakataha ‘a e liliu-lea´ mo hono fatu e fakamatala ‘o e ngaahi tohi ‘oku liliu´, ka ‘oku mu‘a atu e fakalea´ kae toki mui atu ‘a e faka‘uhinga´.

Ka ‘oku ‘i ai ha fakalelei mo ha fakatonutonu mai, ha fakatalanoa pe tokoni ki he liliu-lea´ mo e faka‘uhinga´, pea lafo mai mu‘a (j.havea@tcu.edu). ‘Oku ‘a kitautolu ‘a e faka‘uhinga´, ka ‘oku kei hiliö ‘a e motua‘i-‘uhinga´ mo e füfünaki ‘o e mu‘aki-lea.´

Ko e ‘uluaki fötunga ‘o e ngaahi saame´ ‘oku ‘oatu heni´ ‘oku ou feinga ke fakalalata mai e mu‘aki-lea´. Ko e fötunga hono ua´, ‘a ë ‘e ‘oatu fakataha mo e faka‘uhinga´, ‘e toki ohi ai ‘a e fakalea´ ki he tötö‘onga ta‘anga faka-Tonga´. Ko ia ko e ngäue ni ‘oku te‘eki kakato, pea ‘e ‘i ai ha ngaahi fakalelei ‘e muimui atu.

‘Oku hounga ki he feinga ni ‘a e faingamälie kuo foaki ‘e he kau poupou ‘o e http://www.tongatapu.net.to ke fai ‘a e fetaulaki ‘i he paenga ni.

Saame 1

1	Fiefia ä ka ko ia ‘oku ‘ikai fou he fakahinohino ‘a e kau faikovi´ pe momou ‘i he tö‘onga ‘a e kau angahala´, pe nofo he heka‘anga ‘o ha‘a manuki´;
2	Ka ko e fakahinohino ‘a Atonai hono manako´, Ko e fakahinohino ia ‘oku ne lau-lotoa he ‘aho mo e pö.
3	‘Oku ne hangë ha ‘akau ne tö he ngaahi ve‘e manga‘i vai´, ‘A ë ‘oku laku fua ‘i hono to‘ukai´, ‘A ë ‘oku ‘ikai mae hono lau´ ha taimi´, Ko ia kotoa ‘oku ne fai´ ‘oku ola lelei.
4	‘Oku ‘ikai pehë ‘a e kau faikovi´: ‘Oku nau hangë ha kafukafu puhekina ‘e he matangi´.
5	Ko ia ‘e ‘ikai matu‘uaki ‘e he faikovi´ ‘a e fakamaau´, Pe ko ha‘a angahala, ‘i he ha‘ofanga ‘o e kau faitotonu.
6	He ‘oku ‘ilo ‘e Atonai e fou‘anga ‘o ha‘a faitotonu´, Ka ko e fou‘anga ‘o e kau faikovi´ ‘e tä-pelu.

Saame 2

1	Koehä kuo fono-tau ai e ngaahi pule‘anga pea lamasi-muna ai e ngaahi kakai?
2	Ko e ngaahi tu‘i ‘o mämani´ ‘oku nau fakama‘u hifo ko e kau taki´ ‘oku nau fepoupouaki Ke puleaki‘i ‘a ATONAI´ mo ‘ene pani´.
3	Tau veteki ‘ena ngaahi ha‘i ‘anaua, pea fakapuna meiate kitautolu ‘ena ngaahi kafa.
4	Ne kata hifo ‘a ia ‘oku nofo ‘i langi Manukia kinautolu ‘e he Eiki.
5	Te ne lea kiate kinautolu ‘i he‘ene houhau Pea ‘i he‘ene tuputämaki te ne ‘ai ke nau ilifia:
6	"Ka kuo u fakanofo ‘eku tu‘i ‘I Saione, ko ‘eku mo‘unga tapu!"
7	Kau ‘a‘au ‘a e fekau ‘a ATONAI He ‘ene lea kiate au, "Ko hoku foha´ koe Ko e ‘aho ni kuo u fä‘ele‘i koe."
8	Kole meiate au pea u ‘atu ha pule‘anga mo‘o tofi‘a Pea ke ‘inasi‘aki e ngata‘anga ‘o mämani´.
9	Te ke hau kinautolu ‘aki ha sepita uokamea Pea ‘e hangë ha ipu ‘umea´ ‘a ‘enau maföfoa.
10	‘E kau tu‘i, ke mou faka-poto ä Ke mou tokanga, si‘i kau fakamaau ‘o mämani
11	Tauhi e Eiki´ ‘i he manavahe Pea mavava ‘i he tetetete.
12	‘Uma ki he ‘alo´ telia na‘a ne ‘ita pea ‘auha homou founga´ he ko ‘ene ‘ita´ ‘oku vave ‘ene tafunaki´. Monü‘ia ‘a kinautolu kotoa ‘oku hüfanga kiate ia.

Saame 3

[Ko e Saame ‘o Tevita he‘ene hola mei a Apisalome ko hono foha]

1	ATONAI, hono ‘ikai tokolahi hoku ngaahi fili! Ko e tokolahi ‘oku tu‘u mai kiate au!
2	Ko e tokolahi ‘oku lea‘aki kiate au, ‘E ‘ikai hano tokoni hao‘anga mei a Elohimi Sela
3	Ka ko koe ATONAI ko e pale‘anga ‘oku ‘aofi au Ko hoku langilangi, ‘a ia ‘oku ne puke hake hoku ‘ulu´.
4	Ko hoku le‘o´ ‘oku ou tangi‘aki kia ATONAI Pea ne tali mai kiate au mei hono mo‘unga tapu Sela
5	Na‘a ku tokoto hifo pea u mohe Na‘a ku toe ofo he ko ATONAI ‘oku ne fakatolonga au.
6	‘Oku ‘ikai te u manavahë ki ha mano‘i kakai ‘e ha‘ofia mai takatakai.
7	Tu‘u hake ATONAI, haofaki kita ‘e hoku Otua He kuo ke silafa hoku fili kotoa ‘i honau kou‘ahe Ko e nifo ‘o e angahala‘ia kuo ke laiki pë.
8	‘Oku ‘a ATONAI ke haofaki, Ho‘o tapuaki´, ke mo‘o ho kakai! Sela

Saame 4

[Ki he Taki; mo e ngaahi me‘alea. Ko e Saame ‘o Tevita.]

1	‘O kau ka ui atu, tali mai, ‘Otua ‘o ‘eku totonu. Na‘a ke tukuange au mei he fihi´ Afeitaulalo ‘o fanongoa ‘eku lotu.
2	Ha‘a matäpule, ko futufutunga hono manukia hoku langilangi? Te mou ‘ofa ki he muna, Pea unga he käkä?
3	Ke ‘iloa kuo vahe‘i ‘e ATONAI ‘a e ‘ofeina mo‘ona; ‘Oku fanongoa ‘e ATONAI ‘o kau ka tangi kiate ia.
4	Ke mou tetetete kae ‘ouae faihala ai; Fakalaulauloto ‘i homou mohenga, ‘oua e ngaue Sela
5	Fai ‘ani feilaulau ‘i he totonu´ Pea faaki ho‘omou falala kia ATONAI.
6	Ko e tokolahi ‘oku nau pehë, "‘Oi ke mau sio mai ‘i ha lelei" Hiki hake e maama ho fofonga´, ATONAI e! Sela
7	Kuo ke ‘omi fiefia ki hoku loto´ ‘O hulu he taimi ‘oku tu‘una ai e to‘ukai´ mo e uaine´.
8	Te u tokoto hifo pea u mohe ‘i he fiemälie He ko koe pë tokotaha ATONAI ‘oku ke tuku keu taka ‘i he nonga´.

Saame 5

[Ki he Taki; Fai‘aki e ngaahi mimiha; Saame ‘o Tevita.]

1	Tuku telinga ki he‘eku ngaahi lea´ ATONAI ë Tokanga ki he‘eku to‘e´.
2	Fanongo ki he le‘o ‘o ‘eku tautapa´ ‘e hoku tu‘i mo hoku ‘Otua, he ko Koe ‘oku ou lotu ki ai´.
3	ATONAI, fanongo ki hoku le‘o´ ‘i he pongipongi´ ‘I he pongipongi´, ‘oku ou to‘e mo tatali atu.
4	He ‘oku ‘ikai ko ha ‘otua koe ‘oku polepole he käkä; ‘E ‘ikai fa‘a ‘aunofo ha kovi ki he ‘Afiona.
5	‘E ‘ikai matu‘u ‘a e kau fiehä ‘i ho ‘ao´; ‘Oku ke fehi‘a ki he kau faihala.
6	‘Oku ke faka‘auha ‘a kinautolu ‘oku lea loi Ko e tangata-toto‘ia mo tohoaki-käkä ‘oku fakalili‘a ai ‘a ATONAI.
7	Ka ko au, tu‘unga ‘i he hulu ho‘o ‘alo‘ofa, te u hü ki ho fale; Te u hü ‘i he manavahe ki ho temipale tapu.
8	ATONAI taki au ‘i ho‘o totonu´ telia kinautolu ‘oku tokamalumu; Fakatotonu ho fou‘anga´ ‘i hoku ‘ao.
9	He ‘oku ‘ikai ha falala ‘i honau ngutu; Ko honau loto [‘oku fonu] ko e vanu; Ko honau monga ko e fonualoto fakamanga; Ko honau ‘elelo´ ko e tohoaki-mala.
10	‘E ‘Otua, tuku ke nau fua ‘enau hia´; Tuku ke nau hinga ‘i he‘enau ngaahi fakakaukau Si‘aki kinautolu ‘i he lahi ‘enau faihala, He kuo nau angatu‘u ki he ‘Afiona.
11	Ka ke mavava ‘a ha‘a hüfanga atu kiate koe Ke nau mo‘u hihiki fiefia ‘i ho‘o fakafale kinautolu Pea ke viki ‘iate Koe ‘a e kau ‘ofa ki ho huafa.
12	He ‘oku ke tapuaki‘i ‘a e faitotonu ATONAI ë Hangë hano fakaü, ‘oku ke käpui ia ‘aki e lelei.

Saame 6

[Ki he Taki. Fai‘aki e helefilo ‘o fakatonu ki he Seminite; Saame ‘o Tevita]

1	ATONAI, ‘oua te ke valoki au ‘i ho ‘ita ‘Oua te ke tautea au ‘i ho houhau na.
2	Fakatotoka ATONAI he ‘oku ou vaivai Fakamo‘ui ATONAI he ‘oku ngatötö hoku ngaahi hui´.
3	Ko ‘eku mo‘ui ‘oku takatakatu‘u pë Ka ko Koe ATONAI, ‘e, ko ‘afë ë?
4	Tafoki ATONAI ‘o hamusi ‘eku mo‘ui´ Fakamo‘ui kita tu‘unga ‘i ho‘o ‘alo‘ofa´.
5	Tala‘ehai ‘oku ‘i ai ha manatu atu mei he mate Ko hai ‘e fa‘a viki‘i Koe mei Hetesi?
6	‘Oku ou ongosia he tauto‘e´ ‘Oku täfea hoku mohenga´ he pö kotoa ‘Oku ngaunu hoku ta‘utu‘anga´ ‘i hoku lo‘imata.
7	‘Oku ‘auhia hoku fo‘imata´ he‘eku lotomamahi ‘Oku fakakuikui tu‘unga ‘i hoku kau fakatanga´.
8	Mama‘o meiate au ‘a e kau ngäue ‘o e kovi He kuo ongona ‘e ATONAI ‘a e le‘o ‘o ‘eku tangi.
9	‘Oku ongona ‘e ATONAI ‘a ‘eku kole´ ‘Oku tali ‘e ATONAI ‘a ‘eku lotu´.
10	‘E fakamaa‘i pea fu‘u paa‘usi‘i ‘a hoku fili´ kotoa Te nau tafoki, ka kuo nau fakamä, ‘i ha lau mömeniti.

Saame 7

[Ko e laulau ‘o Tevita na‘a ne hiva‘aki kia ATONAI kau kia Kusa ko e Penisimani]

1	ATONAI ë ko hoku ‘Otua, ko Koe ‘oku ou hufanga ki ai Haofaki au mei hoku kau tuli´ kotoa pea hamusi kita.
2	Telia na‘a ne halu faka-laione ‘eku mo‘ui´ Pea toho kita ki hë kae ‘ikai hato hao‘anga.
3	ATONAI ë ko hoku ‘Otua,ka kuo u fai e me‘a ni Ka kuo pani fehälaaki hoku nima ni
4	Ka kuo u tufa mala ki hoku takanga´ Ka kuo u vete ta‘e ha ‘uhinga hoku mamahi‘anga´^†.
5	Pea tuku ki hoku fili ke ne lamasi pea lakasi kita Tuku ke ne malaki ‘eku mo‘ui´ ki he kelekele Pea ke ne fakamohe hoku ngeia ‘i he efu. Sela
6	Tu‘u hake ATONAI ‘i ho‘o houhau´ Mälanga hake ki he fielahi ‘a hoku mamahi‘anga´ Fafangu mai ‘a e tu‘utu‘uni kuo ke fekau‘i mo‘oku´
7	Tuku e ha‘ofanga ‘o e ngaahi kakai´ ke fakataha kiate koe Ka ‘i he ma‘olunga´, ke ke mavahe hake Koe.^*
8	‘Oku fakamaau ‘e ATONAI ‘a e ngaahi kakai´ Sivi au ATONAI ‘o fakatatau ki he totonu mo e haohaoa ‘o‘oku´.
9	Fakangata ä ‘a e vanu ‘a e kau faikovi´ Ka ke fokotu‘u ma‘u ‘a e faitotonu´ Ko ia ‘oku sivi e ‘atamai mo e loto´, ko e ‘Otua ‘o e totonu ia.
10	Ko hoku fakaü´ ‘oku ‘i he ‘Otua´ ‘A ia ‘oku fakahaofi ‘a e loto-totonua´.
11	Ko e ‘Otua ko e fakamaau ‘o e totonu Pea ‘oku houhau ‘a e ‘Otua ‘i he ‘aho kotoa.
12	‘Oka ‘ikai ha‘a ne liliu, ka ne faka‘alo ‘ene heletä Kuo ne fusi ‘ene kaufana´ pea fakaafo,
13	Kuo ne teuteu kiate ia ha me‘atau fakamate Pea ne ngaohi ‘ene ngaahi ngahau´ ke vela.^**
14	Uoke! ‘Oku ke fofoa‘i ‘a e {pe: feitama ko e} kovi, toloaki ‘a e pau‘u pea fanau‘i ‘a e loi-käkä.
15	Kuo ne keli ha luo pea fakaloloto hifo Pea ne tö ‘i he tauhele na‘a ne ngaohi´.
16	‘E foki ki hono tumu‘aki ‘o‘ona´ ‘ene pau‘u´, ‘E hifo ki hono nge‘esi‘ulu´ ‘a ‘ene ta‘efakalao´.
17	Ke u fakafeta‘i kia ATONAI tu‘unga he‘ene faitotonu´ Kau hiva fakalangilangi ki he huafa ‘o ATONAI Taupotu´.

Saame 8

[Ki he Taki. Fakatatau ki he Kititi. Ko e Saame ‘o Tevita]

1	ATONAI ë ko homau ‘eiki Hono ‘ikai fakangeingei ho huafa ‘i he fonua´ kotoa! Kuo ke fokotu‘u ho langilangi ki he ngaahi langi´^*
2	Mei he ngutu ‘o e valevale mo e kei huhu. Kuo ke tu‘unga ha ü koe‘uhi ko e kau fakatanga´ Ke fakalongo e fili´ mo ha‘a fai sauni.
3	‘I he‘eku vakai ki he ngaahi langi´, ‘A e ngäue ho louhi‘inima´, ‘A e mähina´ mo e ngaahi fetu‘u kuo ke fokotu‘u´,
4	Koehä ai e tangata´ ke ke tokangaekina? ‘A e hako‘i efu, ke ke tauhia?
5	Ka kuo ke ngaohi ia ‘o toe si‘i pea ne ‘otua, Pea te ke fakakalauni‘aki ia ‘a e langilangi mo e faka‘apa‘apa‘ia.
6	Te ke tuku ke ne pule ki he ngäue ho nima´ He kuo ke tuku e me‘a kotoa ki hono lalo va‘e´.
7	‘A e sipi´ mo e pulu´ kotoa, Na‘a mo e fa‘ahinga fekai ‘o e vao na,
8	‘A e manupuna´ ‘o e ‘atä mo e ika ‘o e tahi´ Ha me‘a pë ‘oku fou he ngaahi hala ‘o ngätai´.
9	ATONAI ë ko homau ‘eiki Hono ‘ikai fakangeingei ho huafa ‘i he fonua´ kotoa!

[Ko e Saame 9 mo e 10 'oku na tu'u hoko pë 'o matamata ko e fo'i ta'anga pë 'e taha. 'Oku anga pehë hono fokotu'u atu heni.]

Saame 9

[Ki he Taki; ‘i he mate ‘a e foha; Saame ‘o Tevita]

1	Te u fakamälö kia ATONAI ‘aki hoku loto´ kotoa Te u ‘a‘au ho‘o ngaahi ngäue fakaofo kotoa.
2	Te u fiefia mo hakailangitau ‘i he ‘Afiona´ ‘O hiva‘i ha langilangi ki ho huafa´, si‘i Elioni.
3	‘I he holomui ‘a hoku ngaahi fili´ Na‘a nau humu ‘o ‘auha mei ho ‘afio´.
4	He ‘oku ke tauhi ‘eku totonu mo ‘eku tonuhia Pea ke ‘afio he taloni e Fakamaau ‘o e totonu´.
5	Kuo ke valoki‘i e ngaahi pule‘anga´, faka‘auha e faihala´ Kuo ke tamate‘i honau hingoa ‘o ta‘e ngata pea fai atu.
6	Ko e fili´ kuo pulia, ko e fale-holo ma‘u aipë Kuo ke ta‘aki honau ngaahi kolo´; Pea veteki ‘a e manatu kiate kinautolu.
7	Ka ko ATONAI ‘oku ta‘e ngata ‘ene ‘afio´. Kuo ne fokotu‘u hono taloni ‘o teu ki he fakamäu.
8	‘Oku ne fakamäu ‘a mämani ‘i he totonu ‘Oku ne pule‘i e kakai ‘aki ‘a e auautatau.
9	Ka ko ATONAI ko e malu‘anga ki si‘i faiekina´ Ko e malu‘anga he taimi ‘o e faingata‘a´.
10	Pea na‘e falala kiate koe ‘a ha‘a ‘ilo ki ho huafa He na‘e ‘ikai te ke si‘aki ‘a ha‘a kumi atu ki he ‘Afiona ATONAI
11	Hiva fakalangilangi kia ATONAI ‘a ë ‘oku ‘afio ‘i Saione Fakahä he ngaahi kakai ‘a ‘ene ngaahi ngäue´.
12	He ko ia ‘oku huhu‘i e toto ‘o kinautolu´, ‘oku fa‘a manatu ‘Oku ‘ikai te ne fakangaloki e tangi ‘a e hoke‘ia.^†
13	‘Alo‘ofa mai ATONAI, ‘Afio ki hoku hoke‘ia ‘e ha‘a fehi‘a mai ‘A e ‘Afiona ‘oku hapai hake kita mei he matapä ‘o mate.
14	Koe‘uhi ka u ‘a‘au hao fakalangilangi, ‘I he ngaahi matapä ‘o e ‘ofefine ‘o Saione, Koe‘uhi ka u tome‘e ‘i ho‘o fakahaofi.^*
15	Kuo ngangana ‘a e ngaahi pule‘anga´ he luo ne nau keli´ Ko e kupenga na‘a nau fufü kuo helea ai honau va‘e´.
16	Kuo faka‘ilo ‘e ATONAI ‘e ia ia: ‘Oku ne fai fakamäu; ‘Oku tö ‘a e faihala´ ‘i he tauhele pë ‘a‘ana.Hikaione. Sela.
17	Tuku e faihala´ ke foki ki Hetesi. ‘A e ngaahi pule‘anga kotoa kuo fakangalo‘i ‘a e ‘Otua.
18	‘E ‘ikai ngalo ma‘u ai pë ‘a e ta‘ema‘uhame‘a, Pe ‘e mole ai pë e ‘amanaki ‘a e masiva´ ‘o ta‘e ngata.
19	Tu‘u mai, ATONAI, ke ‘oua na‘a ikuna ‘a e me‘a efu´ Tuku ke fakamäu‘i ‘a e ngaahi pule‘anga ‘i ho ‘ao´.
20	Taa‘i kinautolu ATONAI ‘aki ‘a e manavahë ‘Ai ke ‘ilo ‘e he ngaahi pule‘anga´ ko e me‘a efu kinautolu. Sela

Saame 10

1	Koehä, ATONAI, ‘oku ke tu‘u noa ai´? Pea fakaongotuli he taimi ‘o e faingata‘a?
2	‘Oku polepole-koofi ‘e he faihala´ ‘a e masiva— Ke nau tö ‘i he tauhele kuo nau fa‘u´!
3	‘Oku ‘u‘ua ‘a e faikovi´ ‘i he‘ene fakalusa-noa´ Mahú ‘a e tangata puke´ mo kapeloto kia ATONAI.
4	Pehë ‘e he faikovi´, mo ‘ene fakafäsifasi´, ‘I he‘ene fa‘ufa‘u-kovi´ "‘Oku ‘ikau te ne ‘eke ha me‘a; ‘Oku ‘ikai ha ‘Otua."
5	‘Oku ola ‘ene founga´ ma‘u pë; ‘Oku ‘ikai lavea ia ‘i ho‘o fakamaau´; ‘Oku ne mäfulu ki hono fili´.
6	‘Oku ne pehë, "‘E ‘ikai te u ngaue, Ko e taimi kotoa, ‘e ‘ikai ha‘aku faingata‘a‘ia."
7	‘Oku fonu hono ngutu´ ‘i he fakapapau, käkä, mo e muna; Ko e pau‘u´ ena mo e kovi´ ‘i hono lalo ‘elelo´.
8	‘Oku ne toi mai mei he talalo´; ‘O malumu ke tamatea ‘a e tonuhia; ‘Oku fakasio ‘e hono mata´ ‘a e ta‘etokanga´.
9	‘Oku ne malumu hangë ha laione ‘i hono toi‘anga´, ‘O tali ke puke ‘a e ma‘ulalo´; ‘Oku ne puke e ma‘ulalo´ ‘aki ‘ene täpuni hono kupenga´;
10	‘Oku ne punou, pea sikesike hifo, Pea te‘ia ‘a e ta‘etokanga´ ki hono ivi´.
11	‘Oku ne fakakaukau,"‘Oku ‘ikai tokanga ‘a e ‘Otua´, ‘Oku fufü hono mata´, ‘oku ‘ikai te ne teitei sio mai."
12	ATONAI, tu‘u hake! Hiki ho nima´ ki ‘olunga, ‘e ‘Otua! ‘Oua na‘a ngalo ‘a e kau ngaohikovia.
13	‘Oku makatu‘unga ‘i he hä ‘a e fehi‘a ‘Otua ‘a e angakovi? Kuo ne pehë ‘i hono loto´, "‘E ‘ikai te ke ‘eke ia!"
14	Ka ‘oku ke sio mai! ‘Oku ke tokanga‘i e faikovi´ mo e fakamamahi´! ‘Oku ‘i ho nima´ ke totongi fakafoki. ‘Oku momoi kiate koe ‘e he masiva ia; He ko Koe aipë ‘a e tokoni ‘o e tamai-mate´.
15	Laiki ‘a e nima ‘o e faihala´, Ke a‘u ki ha‘o ‘eke ‘ene faikovi´ ‘E ‘ikai kei ‘ilo ai ha me‘a.
16	Ko ATONAI ‘e tu‘i ‘o lauikuonga pea ta‘engata; ‘E ‘auha ‘a e ngaahi pule‘anga´ mei hono fonua´.
17	Te ke fanongoa ‘a e holi ‘a e faiekina, ATONAI, Te ke fakamateuteu‘i honau loto´; ‘E tokanga mai ho telinga
18	Ke fakamaau‘i ‘a e paea´ mo si‘i havehave´, koe‘uhi ke ‘oua ‘e toe fakaehau ha tangata ‘o e kelekele´.

© Copyright 1997, Jione Havea
j.havea@tcu.edu
Electronic Publication on the Internet through
[ref: http://www.tongatapu.net.to]
Tonga on the 'NET

[For a piece of the Kingdom, and Your Own Domain Name,
http://www.tonic.to easily the Tonic.to Domain Name headaches.]