Pasilika ‘o Sangato Atonio Patua, Nuku’alofa

Sanuali 12, 1999 (09:00 am)

Ko e Lotu Kamata

‘I he huafa ‘o e Tamai, ‘Alo, mo e Laumälie Mä’oni’oni; ‘Otua Mafimafi ko ‘emau tamai ‘oku ‘i hevani, ‘oku mau hanga hake kiate koe he pongipongi ni ‘i ha laumälie kuo tau. Na’a ke fakatupu e fonua mo e ngaahi langi´, pea fakafonu ‘a tahi mo lolo-fonua, hili ia´ na’a ke ‘omi faingamälie ke mau fakatokolahi pea mo tauhi ho’o fakatupu´. Ko e kaveinga ia ‘o e fakataha’anga ni. ‘Oku mau fie ngäue ‘aonga ‘aki homau faingamälie ke kautaha mo koe ke haofaki ho’o fakatupu´.

‘Oku mau ‘ilo ‘eiki ‘e ‘ikai te ke tuku-noa’i ka mau ka pä’usi’i ho’o fakatupu´, he ‘oku ke fepaeekina kinautolu ‘oku fakaehau mo faka’ulungämanu´. Ko ia ‘oku mau falala te ke sivi ‘emau ngäue´ mo e fakakaukau, pea ‘e ‘ikai te ke tuku ke mau fakatu’utämaki’i homau fonua ni.

Ko ho’o tokanga´ ‘oku mu’omu’a ai e fa’ahinga kuo si’aki pea tutuku’i´, ‘a si’i kau masiva´ mo e tukuhausia´, ‘a e ‘äuhë mo e ta’aliekina´, pea ‘oku ke ongona e ngaahi le’o ‘oku ta’etoka’i´. Fakamänava’i e fakataha’anga ni ke fakaongoongo atu ‘i ha laumälie faka’atu’i. Tuku ke ongona he ngaahi alea ni ‘a e faka’uto’uta ‘a e kau taukei´, mo e fusimo’omo ‘a e kau ongosia´. Pea fakaloto-lahi’i kimautolu ke mau lava ‘o fanongo ki he ta’e’iloa´.

‘Oku mau hüfia homau fonua ni, ‘a homau hau´ mo hono fale´ kae’uma’ä ‘a e pule’anga´ mo homau kakai´. Tauange ke kei langi-malü homau ngaahi ‘aho´, pea angiangi-melie ‘a ‘emau fakafeangai´. Tuku ke mau fou atu he founga ‘oku fai ai ‘a e fakamänavahake pea fonu fakatu’amelie, pea ke mau fakatautehina koe’uhi ko ha lelei ma’a homau fa’ahinga´. ‘A koe ko e tu’i ‘o e langilangi´, fanguna homau konisenisi ki ha laumälie fe’unga pea foa homau ngaahi ongo’anga´ ka mau fanongo pea tau ki ha’auna ongoongo mo hono lelei´.

‘Oku mau hüfia ‘a e fakataha’anga ni. ‘A e kau lea mo e kau fanongo, ke ke fakafetaulaki homau ngaahi loto´. ‘Oku ‘ikai ko ‘emau taumu’a´ ke ‘atamai taha, ka ke fe’ilongaki homau ngaahi fakangatangata´. Sino e me’a ke mau toka’i ha loto ‘e kehe mei ha’amautolu´, kae tautefito kiate kinautolu ‘oku ‘ikai faingamälie ke hä honau fofonga´ ‘i he fakataha’anga ni. Tuku ke mau loto lahi ke liliu ‘emau fokotu’utu’u´ ‘o fakatatau ki ha’o angi ‘e fai mai, pea ke mau ‘ilo’i ‘a e taimi ‘o e fakatotoka´ mo e fakato’oto’o´. Fakafaingamälie e ma’ulalo mo e faingata’a’ia´ ke nau fenäpasi mo e fe’ofo’ofani, pea ke lavengamälie ‘o ‘oua na’a lavemuia ha loto. ‘Oku mau fäfä atu he tahi loloto, ko e ‘afiona pë ‘oku taukei ai.

‘Oku ‘i ai ‘emau lea-Tonga ko e kätoanga mo hono tutuku. Ka mau ka tutuku leva pea ke mau tutuku mo e ‘afiona. ‘Oku mau lotu ni tu’unga he mahutafea ho’o kalasia, ‘ia Sisü Kalaisi ko homau ‘eiki, ‘Emeni!