Mapu-mei he-ngalu:

Sapate Ako 1999

‘Eiki lelei ko ‘emau tamai ‘oku ‘i hevani, ‘oku mau fakamälö atu he fakalaolao ka mau a’usia e pongipongi fakakoloa ko eni. Fakafeta’i ‘oku kei ongona e mälö´ ‘i homau ngaahi ‘aho´, he ‘oku kei ope mai ho’o kelesi´. Fakafeta’i ‘oku kei tolonga ‘emau fiefia´ tu’unga ‘i ho’o kei makätaki’i kimautolu. ‘Oku ke se’e ‘a e faingata’a´ mei homau hala´, pea ke fakatokalelei ho’o founga´ ka mau fakaofi atu ai. Neongo ‘oku fa’a hiki homau loto´ meiate koe, kae fakafeta’i ‘oku te’eki maliu ho fofonga´ meiate kimautolu. Taumaiä ne mau lava ‘o lalama e faka’aungafa ‘oku tau kautaha ai´!

Ko e koloa e pongipongi ni ko e kei ongona ho le’o´ ‘i homau kuonga ni, pea kei mä’ali ho sikaina ‘i homau ha’oha’onga´. ‘Oku fai ho’o ui´ mei he loto afi´ mo e vai, pea mau to’o fohe ‘o tali e matua mai ho’o ‘ofa´. Mo’oni kuo fakatavänuku hamau ni’ihi, ka ‘oku kei takanga ‘emau fohe´ ‘o fakaongo ki ho’o angi´. ‘O mau fäfä atu he tahi loloto ko e ‘afiona pë ‘oku taukei ai. Fakafeta’i ‘oku lavengamälie ho’o fakataulama´, ‘o ‘ikai lavemuia si’emau fononga´.

‘Oku mau tokanga he ‘aho ni ‘eiki ki he ako si’emau fänau´. ‘Oku mau fa’a lau ‘emau fänau´ ko homau kaha’u kinautolu, kae puli ‘iate kimautolu ko ho’o me’a’ofa kinautolu ‘oku mau tauhi. ‘Ikai ngata ai ka ko homau kaha’u´ foki ko ho’o me’a’ofa mo ia kiate kimautolu. Ko ia ‘oku mau tekaki hake ‘a homau kaha’u´ mo ‘emau fänau ki he ‘afiona´. ‘Oku ke ‘afioa ‘eiki honau fakangatangata´ mo e vëkeveke ‘enau ngaahi angafai´. ‘Oku mau luva atu kinautolu kiate koe ke ke huhu’i ‘enau faifaimälie´, pea hu’i ha anga ‘oku hala mei he’enau ngaahi mo’ui´. Kae fafanga kinautolu ‘aki ‘a e ngaahi ongoongo ‘oku lelei´, mo e ngaahi lau ‘oku mälie, pea ke fakalakalaka ‘enau to’o fohe´ he vaa’ivaka toputapu´. Tauange ‘e kei melie ‘enau ngaahi feinga ako´, pea nau tutupu hake ko homau fakakoloa. Sinoeme’a ke kei malü ho finangalo koe’uhi ko kinautolu, ke faka’ilonga ‘oku tau kei kau ‘eiki.

Pehë ‘eiki ‘emau hüfia homau fonua´. ‘A e takavaha ‘a homau hau´, fakaola mu’a e kaveinga ‘o e folau´ he ko koe ‘a e kaivai poto´ mo e matavai ‘o e mo’ui´. ‘A e tu’i fakale’o´ ke ke kau ai, ‘o le’ohi hono hala telia ha fakaehau. Tokonia ‘a e palemia mo homau pule’anga´ ke nau kei fakaongo ki he pule ‘oku fai mei Itaniti´. He ‘oku taauma’u ‘emau hüfekina ke hoko ho’o pule´ ki mämani ‘o hangë ko ia ‘i he langi. ‘Oku mau hüfia ‘a e palesiteni mo e kau taki-lotu, kae’uma’ä e kakai homau fonua ni. Fai ho’o angi´ ‘eiki, ‘o ke angi-mu’a ka mau angi-mui atu ‘i ho’o fou’anga toputapu´. ‘A e falelotu ni mo hono kau kauala´, ‘a hou’eiki mo ha’a matäpule, ‘a e ongo faha’ifale´ mo e toekai´ — tongi ha kovi ‘oku tu’utaiki ‘i homau ngaahi loto´, ka ke fakalalata homau laumälie´. Tuku ke mau laka atu he fakamänavahake´ mo e fakatu’amelie´, pea ke mau fakatautehina koe’uhi ko ha lelei ma’a homau fa’ahinga´. ‘Oku mau lotu ma’a e kau faingata’a’ia´, fakaesino pe ko e koloa mo e käinga, ke mau kei fanongo ki ho’o ui ‘oku fai mai ‘o muimui atu ki he fiemälie. Fanguna homau konisenisi ki ha laumälie fe’unga pea foa homau ngaahi ongo’anga´ ka mau fanongo pea tau atu kiate koe.

‘Oku mau tautau atu kiate koe ‘emau ngaahi mo’ui´, ‘a e sino, laumälie, mo e ‘atamai, ke fai mei langi na homau fakataau´. ‘Oku mau falala te ke malava noa ke fakatau homau ngaahi mo’ua´, pea veteange homau ngaahi ha’isia´. He ko e ta’aliekina´ ‘oku ke fakaai, pea ko e si’ekina´ ‘oku ke ohi ko ho’o fanga pele. Fëfë ai kimautolu mo e hü ‘oku mau fai atu´. Tauange te ke kei tokangaekina ‘a e fusimo’omo homau loto´ mo e ‘atamai.

Afe mai ä ‘eiki ‘o puke atu kimautolu. Luluku ‘emau ngaahi mo’ui´ ‘i ho finangalo ongongofua´, pea fakapuna homau laumälie ke hangë kuo fai kapakau´. Fakatü’uta ä e lotu ‘oku mau fai´ ki he fanga e ‘alo’ofa´, he ‘oku kei mahutafea ho’o kelesi´ pea te ke faka’atu’i kimautolu. Taki ä homau fononga´, he ‘oku mau fakaongo atu´. ‘Oku mau kole ‘a e ngaahi me’a ni kotoa tu’unga ‘i he huafa ‘o Sisu Kalaisi ko homau ‘eiki´, ‘Emeni!